CEBU, Philippines - Gitunod na sa lubnganan ang haya sa usa ka amahang mimasaker sa iyang pamilya ug ang ilang katabang nga nahilakip sa maong masaker sa managlahing menteryohan sa dakbayan sa Sugbo ug Talisay kagahapon sa hapon.
Si Emmanuel Ponce, 53, kinsa miunay pagpatay sa iyang asawa ug tulo ka mga anak didto ilubong sa Queen City of the South Cemetery sa dakbayan sa Sugbo sa ala 1:00 kagahapon sa hapon.
Samtang nianang pagka-alas 2:30 sa hapon gilubong usab si Anastacia Deniega, 30, ang katabang sa panimalay nga gilakip ni Ponce sa pagmasaker didto usab ilubong sa menteryohan sa barangay Poblacion, dakbayan sa Talisay
Si Ponce didto misahe sa simbahang Katoliko sa Mabolo, dakbayan sa Sugbo, samtang si Deniega didto usab misahe sa simbahang Katoliko sa Poblacion, Talisay. Si Msgr. Pat Alcazaren, maoy midumala sa misa sa haya ni Ponce ug sa dayon nang tunod sa lubnganan, may usa ka ig-agaw ni Ponce nga sukad sa ilang pagkabata karon pa niya makita sa katapusang higayon ang naulahi , igo lang mipatulo sa iyang luha.
Usa siya sa kapin 20 ka tawo nga mihatod sa lubong ni Ponce lahi sa kang Deniega nga gitambungan sa mga 50 kapin ka mga kabanay, silingan ug kahigalaan niini sa Talisay.
Ang kamanghorang anak ni Ponce nga si Embrelaince Therjoy, 13, kinsa mao ray nalibre ug naluwas sa maong masaker wala na makatambong sa lubong sa naulahi tungod kay milarga na kini ngadto sa Sorsogon niadto pang Biyernes kauban sa iyang mga kabanay kinsa mao usab ang nagdala sa mga haya sa iyang inahan ug tulo ka mga maguwang aron adto ilubong didto.
Mahinumdoman nga niadtong Domingo gigamit ni Emmanuel, ang iyang .45 kalibreng pistola pagpusil patay sa iyang asawa nga si Melinda, 53, iyang mga anak dalaga nga si Elaine Grace, 26, ug Heather Joy , 23, ug ang ulitawo niining anak nga si Emlin, 18, ug si Deniga, 30, sulod sa ilang pinuy-anan sa Palm View Village sa Tabunok, Talisay.
Una siya magpusil sa iyang kaugalingon gipakanaog una niya ang iyang anak kamanghoran nga si Embrelaince pagtawag og kapolisan sa dakbayan sa Talisay. (BANATNEWS)