Negosyante buot mopasuspenso sa 4 polis

CEBU, Philippines - Negosyanteng mireklamo batok sa upat ka polis sa lungsod sa Alcoy mihangyo sa Office of the Ombudsman-Visayas nga dalion ang pagpasuspenso kanila tungod sa gibutyag sa iyang testigo.

Si Jose Earl Plando, negosyante og kanding ug molupyo sa nahisgutang lungsod misumiter sa supplementary affidavit sa iyang gihulagway nga vital witness nga si Edward Abanilla kalabot sa insidente nga nahitabo niadtong Oktubre 6.

Sumala pa sa affidavit nga gisumiter ni Abanilla gipugos siya sa maong upat ka polis aron pasanginlan si Plando nga maoy nangawat og kanding sa usa ka Luz Jackson.

Matud pa niini nga silang duha maoy nagkuyog ni Plando dihang giimbitar ang naulahi sa mga polis diha sa maong presinto ug gibuwag sila og interogar apan dihang siya na maoy gisukit-sukit gibati siya og kahadlok tungod sa pagpanghulga kaniya kung dili niya itudlo si Plando nga maoy mikuha sa kanding.

Si Plando una nang misumbong sa Ombudsman nga napugos siya og bayad sa kanding nga P12 mil bisan wala siya mangawat niini tungod sa pagpanghulga kaniya sa maong mga polis. Si Plando nakatulog sa prisuhan nianang gabhiuna.

Si PO2 Raniel Cartin nga usa sa sinumbong nahinabi sa Banat News mihimakak sa maong pasangil nga namugos sila ni Abanilla ug kini mapamatud-an sa kagawad sa barangay nga si Plando ug Abanilla maoy mikawat sa kanding.

Giklaro sad niyang walay nahitabong illegal detention tungod kay aduna may saksi nga nagtudlo sa duha nga maoy responsable sa pagpangawat ug ilaha kining giaksyonan human moreklamo si Luz Jackson.

Samtang ang hepe sa kapolisan sa lungsod sa Alcoy Insp. Reyco Romagnera nga nahinabi sa Banat News nakugang sa reklamo ni Plando kay wala kini moagi kaniya.

Sumala pa niya nga siya mismo kung giduol lang ni Plando mahimo nang mopaubos sa imbestigasyon batok sa maong upat ka polis. Hinuon tungod niini mopahigayon og imbestigasyon si Romagnera sa maong mga polis.  - BANAT NEWS