Papel nga "Big Brother" awhag ni Palmones sa CVPPCO

CEBU, Philippines - Gihagit ni AGHAM Partylist Rep. Angelo Palmones ang mga sakop sa Central Visayas Pork Producers Cooperative sa pagbarog sa papel nga ‘big brother’ ngadto sa mas daghang gagmay’ng namuhi og baboy.

Si Palmones kinsa maoy pinasidunggang dinapit sa labing unang anibersaryo sa CVPPCO namulong nga aron molambo ang industriya sa pamuhi og baboy sa nasud kinahanglang dili biyaan sa mga naghugpong mga hog raisers ang mga backyard farmers kun kadtong namuhi lang og pipila lang ka baboy.

Sumala pa niya nga angayang tudloan sa mga sakop sa CVPPCO ang backyard farmers sa mga teknik alang sa abundang pagpamuhi og baboyan ug agnihon sila nga magpasakop sa ilang kahugpungan.

Sa pagkakaron, 35 porsiyento palang sa mga namuhi og baboy ang naghiusa ug naghugpong aron mapalambo ug maproteksyonan ang ilang industriya apan 65 porsiyento usab nagsuplay gihapon og baboy sa kamerkaduhan ang nagagikan sa backyard farming.

Matud pang Palmones nga kung ang CVPPCO motabang sa mga gagmay’ng mag-uuma mapadaghan niini ang ilang mga miyembro ug sa maong paagi mas aduna na sila’y tingog unya ngadto sa gobiyerno kun aduna sila’y problema.

Gidugang ni Palmones nga wala na kinahanglana pang adunay mga balaudnon nga pandayon aron matabangan ang mga namuhi og baboy sanglit daghan nang mga balaod kabahin niini ug kinahanglan lang nga masubay ug matun-an.

“The challenge to you (CVPPCO) is to assume the role of ‘big brother’ to our backyard farmers,” matud pang Palmones. Sumala pa niya nga pinaagi sa eksperiyensya sa mga sakop sa CVPPCO matabangan nilang mahaw-as sa kalisod ang mga gagmay’ng mag-uuma ug dili na unya sila magsalig pa sa ‘pantawid program’ sa gobiyerno.

Si Roland Tambago ang presidente sa CVPPCO mibutyag sa mga tigbalita nga mao na karon ang ilang tumong aron mapalig-on ug mapalambo ang industriya sa pamuhi og baboy. (EIM) (BANATNEWS)