15-anyos gilugos sa 17-anyos

CEBU, Philippines - Usa ka 15-anyos nga babaye ang gilugos sa laing 17-anyos nga menor de edad sa duol sa tunghaan niadtong Sabado sa gabii samtang gikan silang nang disko sa usa sa mga barangay sa lungsod sa Moalboal.

Kasong kalapasan sa RA 7610 kun Special Protection of Children Against Abuse, Exploitation and Discrimination Act ang gipasaka kagahapong adlawa batok sa 17-anyos nga gipasanginlang milugos sa 15-anyos nga batang babaye nga tinun-an sa high school.

Nahitabo ang pagpanglugos niadtong Domingo sa kaadlawon atol sa kapistahan sa barangay Saavedra sa naasoy’ng lungsod.

Ang maong kaso anaa karun gisang-at   diha sa Provincial Prosecutor’s Office human nasuta nga nakuha gyud ang pagkababaye sa bata base sa medical examination result.

Ang suspetsado nagpuyo sa barangay Tuble sa naasoy’ng lungsod nga tinun-an sa kolehiyo sa usa sa mga inilang unibersidad dinhi sa dakbayan sa Sugbu padayon pang gawasnon atol ning pagkutlo sa balita.

Sa imbestigasyon sa kapulisan niadtong Sabado sa gabii, ang biktima uban sa iyang mga higala nga giingong pulos hubog dihang iyang nakaila ang suspek sa diskohan sa maong barangay.

Matud pa nanggawas sila sa diskohan ug didto sila mipaingon sa Saavedra Elementary School pipila ka metros ang distansya gikan sa diskohan apan sa pag-abot nila sa ngitngit nga lugar sa maong tunghaan, kalit gibira sa suspek paingon sa daplin ang biktima ug didto gipahimuslan. Sumala pa nga human sa pagpanglugos giingong gisultihan sa suspek ang biktima nga: “inom daghan tubig para kaihi ka para di ka mabuntis.”

Apan sa kabalaka ug kahadlok sa nahitabo kaniya misumbong ang biktima sa iyang inahan ug nagkuyog sila ngadto sa police station.

Apan si PO2 Teodolo Baya Jr. nagkanayon nga ang inahan sa suspek mianha sa police station ug nangayo’g tabang kay ang iyang anak na missing.

“Mao iyang alegasyon wa pud ta kahibawo kung tinuod ba,” matud pang Baya apan miingon nga ilang gitambagan nga mas maayo pang ilaha nalang ihatud ang ilang anak sa kapolisan. (Rey B. Pasaporte/EIM)   (BANAT)