CEBU, Philippines - Human ipakita sa mga batan-ong miyembro sa gang kaniadto sa lungsod sa Minglanilla ang ilang tinud-anay nga pagtabang sa kampanya batok sa graffiti, nakadawat sila og pahalipay gikan mismo sa gobernadora.
Personal gayud nga gihatod ni Governor Gwendolyn Garcia didto sa maong lungsod niadtong Oktubre 18, ang iyang regalo ngadto sa maong mga batan-on.
Kini agi og pasalamat sa gobernador sa maong grupo kinsa kaniadto maoy responsable sa mga vandalism o mga hugaw nga suwat-suwat sa mga pader daplin sa kadalanan apan karon kaabag na sa gobernador sa paglimpyo sa maong mga pader.
Ang maong mga regalo nga gidalit sa gobernador sa maong mga kabataan, mao ang mga T-shirt ug pagkaon.
Gawas niini pakuyogon pa gayud ang nahisgutang mga batan-on sa Suroy Suroy Sugbo Southern Heritage Trail ugma, Oktubre 21 ug i-tour usab sila sa gobernador ngadto sa Isla sa Camotes.
Ang maong lakang sa gobernador gidayeg kaayo sa mga ginikanan sa maong mga batan-on ug sa mga opisyales sa lungsod sa Minglanilla. (Chester Abadilla/WC) (BANAT)