2 balay naigo sa mga bato sa Kalunasan

CEBU, Philippines - Duha ka balay ang nangaigo sa mga dagkong bato ug lapok sa nahitabong landslide sa sitio Saint Anthony sa barangay Kalunasan ning dakbayan kagahapon sa buntag.

Hinuon walay nangasakitan sa dihang naigo sa dagkong mga bato ang panimalay nila ni   Antonio Iran ug Lucia Abellanosa.

Sumala sa secretary sa disaster team sa Kalunasan nga si Edna Punay ang bungbong nga ginama sa hollow block sa balay ni Iran natumpag gumikan sa kakusog sa pagligid sa mga bato gikan sa ibabaw nga bahin samtang naguba usab ang kasilyas sa balay ni Abellanosa ug nasulod gyud ang bato sa ilang balay.

Nagkanayon si Abellanosa nga natulog siya niadtong higayona ug kalit lang nga nakadungog siya og saba hinungdan nga dali siyang nigawas ug nakalikay sa lapok ug bato nga misulod sa iyang panimalay.

Ang mga biktima gikatakdang patabangan sa Department of Social Welfare and Services aron matagaan kini og hinabang.

Nunot niining pagsige og pangliki sa mga yuta sa maong barangay ipasusi ngadto sa mga geologists sa hepe sa Cebu Disaster Risk Reduction and Management Council (CDRRMC) nga si Alvin Santillana ang maong dapit.

Nagkanayon si Santillana nga tangason ug duol sa sapa ang nahisgutang mga sitio sa Kalunasan sama sa Lareha ug Lokana busa pipila na ka mga landslide ang miigo sa maong dapit panahon sa uwan.

“Kung moana ang geologists nga dili siya pwede puy-an, mohimo ko og rekomendasyon nga pabalhinon og laing lugar ang namuyo diha aron maseguro ang ilang kaluwasan kung dunay mga uwan,” matud pa ni Santillana.

Matud pa ni barangay kagawad Boyet Ocampo nga duha ka balay nga naapektohan sa maong insidente ug naapektahan sad ang dalan maong wala una nila kini paagii og sakyanan tungod sa kahumok sa yuta.

Samtang si Kapitan Nunilon Monares sa Kalunasan nanghinaut nga mahatag na unta sa dili madugay ang 200 ka sakong semento nga iyang gi-request sa City Hall nga tuyo nilang gamiton sa pag-rip rap sa mga lugar sa iyang barangay nga pirmeng modahili ang yuta.

Samtang sa pikas bahin gihulagway sa Regional Disaster Risk Reduction and Management Council (RDRRMC)-7 nga wala kaayo makaapekto sa Central Visayas ang bagyong Ramon sa imprastraktura ug agrikultura tungod kay nakapangandam ang publiko. (Uban sa report ni Rey Pasaporte/EIM) (BANATNEWS)