Landslide sa Lagtang nakabalda sa trapiko

CEBU, Philippines - Mikabat ngadto sa upat ka oras ang paghawan sa yuta ug mga bato nga mitabon sa karsada sa sitio Tangub, barangay Lagtang, dakbayan sa Talisay diin tulo ka balay ang diriyot mataboni ug tulo ka habal-habal ang nangatumba tungod kay naglisod na sa pag-agi.

Si Kapitan Marc Ferdinand Bas nga nahinabi sa Banat News mibutyag nga ang maong yuta ug mga bato gikan sa quarry diha sa lugar ug tungod sa pagbunok sa uwan dala sa bagyong Ramon midahili kini kagahapon sa kaadlawon.

Gibana-bana nga 80 metros ang gitas-on sa karsada nga natabonan sa yuta ug mga bato nga nakahasol sa mga tawo ug motorista nga moagi diha sa lugar, wala hinuoy nangaangol sa insidente. Ang tagdumala sa quarry maoy unang nagpadala og heavy equipment sa paghawan sa karsada ug misunod dayon ang city engineering.

Si Bas nagkanayon nga gawas sa dahili sa yuta duha ka sitio sa Lagtang nga mao ang Ilang-ilang ug Tinggaong ang naapektohan sa baha ug gani usa ka balay ang nasudlan sa tubig baha ug miabot sa hawak ang giladmon sa tubig. Sa laing bahin, gawas sa Lagtang ang city Social Welfare ug kapolisan walay nadawat nga laing report kabahin sa dahili sa yuta ug baha sukad kagahapon sa buntag.  - BANAT NEWS