Gidemolis sa Palma St. nangita na sa P10 mil

CEBU, Philippines - Mipadala og suwat ang CTU-Palma Association ngadto sa kagamhanan sa Siyudad sa Sugbo aron mangumusta kun hain na ang gisaad nga P10,000 alang kanila kalabot sa programa sa siyudad nga matagaan gyud og financial assistance ang maigo sa demolisyon.

Sumala pa sa suwat nga gipadala sa maong kapungongan ngadto sa buhatan ni Konsehal Alvin Dizon nga naguba na ang mga istraktura nila sa tunga-tungang bahin sa miaging bulan apan wala pa sila kadawat sa maong financial assistance.

Ang presidente sa maong grupo nga si Ruel Nuga nagkanayon nga nahinabi na nila kaniadto si Mayor Michael Rama kalabot sa maong programa.

Samtang si Cebu City Administrator Jose Mari Poblete nagkanayon nga nakahimo na sila karon og draft sa guidelines sa maong programa ug mohimo na lang sila og tigom niini sa Department of Social Welfare and Services, Department of Manpower Development and Placement, Department of Manpower Development and Placement ug uban pa nga mga departamento sa City Hall.

Nasayran nga moabot ngadto sa 35 ka mga pamilya ang naapektohan sa demolisyon sa mga balay nga namuyo kilid sa Cebu Technological University.

Nasayran nga taud-taud na nga namuyo sa ilang puwesto ang mga residente sa maong dapit diin ang uban niini nangangkon nga nagsugod sila pagpuyo niadto pa nga 1980’s.  - BANAT NEWS