P15 mil nasakiyo sa mga tulisan

CEBU, Philippines - Mokabat sa P15 mil ang kantidad sa kwarta nga koleksiyon sa usa ka lending collector kinsa gitulis sa duha ka wala mailhing mga armadong lalaki nga nagtaptap sa ilang mga nawong didto sa mingaw nga lugar sa sitio Pio Veloso, barangay Antipolo sa lungsod sa Medellin niadtong Huwebes sa alas 4:30 sa hapon.

Ang biktima mao si Marlon Dagasdas, 29-anyos, ulitawo, taga barangay Sudlonon, dakbayan sa Bogo, kolektor sa Cooline Cooperative and Merchandise nga nahimutang usab sa dakbayan sa Bogo. Si PO1 Rosano Queddeng sa Medillen Police dihang nahinabi sa Banat News mibutyag nga ang biktima gikan nga nangoleksiyon sa ilang mga utangan sa barangay Mahawak sakay sa iyang service nga motorsiklo.

Giingong ang biktima giatangan sa duha ka mga tulisan diha sa lugar nga nahitaboan ug gipahunong dayon gitionan kini og pusil ug gikuha ang yawe sa motorsiklo ug ang bag nga gisudlan sa kwarta nga nakolekta

Ang mga tulisan daling nisibat nagsuot-suot sa kalibunan dala usab ang yawe sa motorsiklo hinungdan nga naglakaw nalang nga nidangop sa kapolisan ang biktima.

Maayo nalang gani wala maapil og kuha sa mga tulisan ang laing P15 mil nga koleksiyon sa biktima nga diha niya gibutang ilawom sa u-box sa motor. (BANATNEWS)