Mga kawani sa Compostela midepensa ni Noval

CEBU, Philippines - Hangtod karun nagpabiling walay mayor ang lungsod sa Compostela tungod sa bangi sa politika ug hasta ang mibarog nga officer-in charge nga si DILG Regional Director Pedro Noval wala palabya sa intriga.

 Ang Banat News personal nga miadto sa maong lungsod aron sutaon kun unsa ka tinuod ang akusasyon nga nadawat sa buhatan sa bise-gobernadora Agnes Magpale nga giingong negatibong report batok ni       Noval.

Sa pakighinabi sa Banat News sa usa ka utility worker (pangalan gipugngan sa Banat News) sa munisipyo sulod na sa 25 ka tuig mihulagway kang Noval nga patas ug wala pa siya makadungog nga aduna kini gipaboran kanila.

Kini miingon nga matag adlaw’ng Lunes mopatawag og meeting si Noval sa tanang empleyado aron hisgutan ang mga problemang nasinati sa matag departamento.

Laing kawaning babaye nga naa sa administrative work sulod na sa 20 ka tuig mao usab og paghulagway kang Noval nga dili kini ‘unfair’sa mga kawani.

Gani mihulagway hinuon kining mas maayo ang pagdumala ni Noval tungod kay ang mga magbubuhis misunod gyud sa ilang mga tulubagon sa buhis.

Samtang ang ubang empleyado sa munisipyo nga mihangyo sa Banat News nga dili magpahingalan pulos nangangkong wala sila makasugat og susamang alegasyon batok kang Noval.

Bugtong problema nga ilang nasinati mao ang wala nila pagkadawat og usbaw sa suholan tungod kay walay konseho nga moatiman niini.

Samtang usa sa mga empleyado mibutyag nga kun aduna may special treatment nga nahitabo sa pagpadagan ni Noval silang mga trabahante mismo unta ang motiyabaw og una.

Pulos nila gibasol ang pamolitika maoy hinungdan sa ilang problema sa lungsod . “Ang naka-ingon aning among kahimtang karun politika man gihapon.”

Samtang si Noval sa iyang bahin mibutyag nga nadawat na niya ang order nga siya ibalhin na sa Tacloban apan wala pa siya makadawat og order pagkanaog isip OIC-Mayor sa nahisgutang lungsod.

Kahinumduman nga sa miaging tuig buwan sa Hulyo human ang eleksyon mitumaw ang tensyon sa nahisgutang lungsod human ang kampo ni Mayor-Elect Joel Quiño giprotestahan sa kampo ni kanhi mayor Ritchie Wagas. (BANATNEWS)