CEBU, Philippines - Nakadawat og award ang pangulo sa Provincial Veterinarian's Office ug Provincial Health Office gikan sa Department of Agriculture ug Department of Health.
Ang mga midawat sa award gikan sa buhatang central sa DA mao si Provincial Veterinarian Dr. Mary Rose Vincoy, samtang si Dr. Cristina Giango mao usab ang midawat sa pasidungog gikan sa ulohang buhatan sa DOH .
Sigun pa ni Vincoy nga ang gibasehan sa paghatag sa maong award mao ang pagdeklarar sa DA ug sa DOH nga Rabies Free Zone ang Camotes Group of Islands ug Malapascua Island sa lungsod sa Daanbantayan.
Siya midugang nga ang maong award nakab-ot tungod sa hugot nga pagpatuman sa mga programa ni Governor Gwendolyn Garcia nga nagtinguha sa pagsumpo sa pagkuyanap sa sakit nga rabies sa tibuok probinsiya sa Sugbo.
Miingon si Vincoy nga ang maong pasidungog gihimo tungod sa paglambo sa turismo didto sa Camotes Group of Islands ug sa isla sa Malapascua.
Midugang si Vincoy nga ila karong gitinguha nga makaangkon usab sa susamang recognition ang isla sa Bantayan.
Sa laing bahin daghan pa kaayong mga lugar ning lalawigan diin ang kampanya batok sa rabies wala mosaler tungod sa kagahi mosanong sa katawhan.
Kasagaran sa mga molupyo mamuhi og hayop nga iro bisan walay ikapakaon niini kay gani sa ilang kaugalingon walay makaon.
Ang mga lokal nga opisyal sa barangay mao unta ang angayang mo-edukar sa ilang katawhan pinaagi sa pagtudlo nga kun mamuhi og iro kinahanglang hiktan, pakaonon ug atimanon ug dili kay pasagdan lang nga maglibud suroy aron mangita og pagkaon.
Gumikan sa kahugaw sa ilang makaon, ang kagaw sa rabies anha sa ilang baba ug sa higayong makahambat og tawo mamatay ang mapaakan gumikan sa rabies. - BANAT NEWS