CEBU, Philippines - Wala na makamata pa ang usa ka gidudahang tiggamitan og gidiling drugas human gisaka ug gipusil sa ulo samtang nahinanok sa pagkatulog sa pinuy-anan sa iyang higala diha sa barangay Matab-ang sa dakbayan sa Toledo niadtong Biyernes sa alas 12:45 sa hapon.
Ang biktima nga diretso og kamatay mao si Samuel Aranez,22, molupyo sa sitio Ginabihan barangay Arpili lungsod sa Balamban.
Matud ni SPO3 Carmelito Hornales sa Toledo City Police dihang nahinabi sa Banat News ang biktima mi-adto kini sa pinuy-anan sa usa ka Reynaldo Toquero ug nananghid nga anha mopahuway.
Apan samtang kini natulog usa ka wala pa mailhing lalaki ang misaka ug midul-it pagpusil sa ulo niini.
Ang mga polis nga miresponde sa crime scene naka-recover og duha ka sachet nga dunay sulod nga gituohang shabu sa patay’ng lawas sa biktima, ingon man cellphone nga gisudlan usab sa duha ka linikit nga tin foils.
Samtang duha ka kabhang sa bala sa kalibre .380 nga pistola ang nakuha sa kapolisan duol sa biktima nga maoy gituohang gikan sa armas nga gigamit sa mamumuno.
Si Toquero kasamtangan karong giimbestigar sa kapolisan kabahin sa krimen.
Gidudahan sa kapulisan nga may kalambigitan sa bisyo sa gidiling drugas ang motibo sa krimen.