Kenyan wa mahibalong may shabu sa bag

CEBU, Philippines - Gihimakak sa Kenyan national nga iya ang nasakpang tulo ka kilong shabu nga nakuha sa iyang bagahe diha sa Mactan Cebu International Airport niadtong Huwebes sa hapon.

Si Asha Apiano Ogutu, 24, mibutyag atol sa gipahigayon nga press conference sa buhatan sa National Bureau of Investigation (NBI) hinatag ang bag nga iyang gisudlan sa iyang mga butang apan wala siya masayod nga aduna diay kini sulod nga drugas.

Matud pa ni Ogutu nag-abot sila sa iyang bag-ohay lang nakailang Kenyan nga ginganlan og Rey sa nasud sa Republic of Benin (sa West Africa) tungod sa gitanyag nga negosyo sa mga panapton.

Human niini gitanyagan siya niini og libreng bakasyon ug usa ka semana dinhi sa Sugbu nga iyaha usab gidawat bisan wala siyay ideya dinhi ug laing higala niyang Kenyan nga giila niyang si Joshua mihatag kaniya og traveling bag nga maoy iyang gisudlan sa iyang mga gamit.

Apan giklaro ni Ogutu nga wala siya masayod nga dunay ilegal nga drugas ang maong bag. Wala say gitanyag kaniya si Rey sa pagbakasyon niya sa Cebu gawas lang sa pag-ingon nga patawgan kini kun moabot dinhi. Si Ogutu nga usa ka single-mother ug may duha ka anak nga 10-anyos ug 6-anyos nanglugmaw ug nakahilak dihang iyang nasabtang posible siyang mabilanggo sa tibuok kinabuhi dinhi.

Samtang si NBI-7 Director Eduard Villarta, misaysay nga ang NBI nakadawat og impormasyon gikan sa Manila nga adunay Kenyan nga nagbitbit og drugas hinungdan nga iyang gipahibalo ang Bureau of Customs, Bureau of Immigration ug Philippine Drug Enforcement Agency aron ilang sugaton diha sa MCIA.

Matud pa ni Villarta nga ang drugas gitagoan sa secret compartment nga gibana-banang balor P18 milyones, kini nakompirmar nga shabu human sa confirmatory test.

Mibutyag si Villarta nga ang maong drugas dili alang sa Sugbo kay dad-on kini sa laing nasud apan wala na siya mobutyag kun asa tungod kay aduna pa silay followup operations.

Kasong kalapasan sa Section 5 sa Republic Act 9165 kon transporting of illegal drugs maoy ipasaka sa NBI batok sa Kenyan national diin isang-at kini sa korte sa Lapulapu. (BANATNEWS)