Drayber sa Libreng Sakay embargoha’g lisensiya
CEBU, Philippines — Mihulga si Department of Transportation (DOTr) Secretary Vince Dizon nga bawian og lisensya ang mga drayber sa Libreng Sakay nga magdumili sa pagpasakay og mga pasahero sa oras sa serbisyo nga gibayran sa gobiyerno.
Gipagawas ni Dizon ang pasidaan human adunay mga reklamo nga pipila ka drayber sa programa ang dili mopasakay og mga commuter nga naghulat.
Matud niya, makigkoordinar siya sa Land Transportation Franchising and Regulatory Board (LTFRB)-7 aron aksyunan ang mga reklamo ug maseguro nga motuman ang mga drayber sa ilang obligasyon.
Gidasig usab niya ang mga drayber nga adunay problema sa suweldo nga moreklamo sa LTFRB o DOTr, apan gipasiugda nga dili angay nga pasagdan ang mga pasahero tungod sa ilang panagbangi sa operator.
Gipahinumdoman usab ni Dizon ang mga drayber nga mosakay ug mopanaog lamang og mga pasahero sa gitakdang hunongan aron malikayan ang pagsamok sa trapiko.
Samtang, giimbestigahan sa LTFRB-7 ang duha ka transport operator nga JP and Sons Transport Group Inc. ug Aleja Fua Rent A Car Corp. human sila padalhi og show-cause orders niadtong Oktubre 31 tungod sa alegasyon nga ang ilang mga sakyanan nagdumili sa pagsakay og pasahero.
Ang Libreng Sakay, nga nailhan usab nga Love Bus sa Sugbo, naghatag og libreng sakay sa mga commuter sa mga apil nga ruta gikan alas 6 hangtod alas 9 sa buntag ug alas 5 hangtod alas 8 sa gabii, adlaw-adlaw lakip ang weekends ug holidays.
Lakip sa mga ruta ang Parkmall sa Mandaue City paingon sa Urgello sa Cebu City ug Anjo World sa Minglanilla paingon sa SM Seaside. (BANAT NEWS)
- Latest
