Mga trak sa basura sa Cebu City dili na paagion sa Mandaue City

CEBU, Philippines - Mga trak sa basura sa kagamhanan sa dakbayan sa Sugbo nga magkarga og basura nga ilabay sa dumping area sa lungsod sa Consolacion dili paagion sa mga dalan sa dakbayan sa Mandaue.

Si Konsehal Benjamin Basiga nga maoy chairman sa committee on environment sa konseho sa maong dakbayan nga nahinabi sa Banat News miingon nga sa miaging gabii tulo ka mga dump truck sa dakbayan sa Sugbo ang ilang gidakop. Hinuon si Basiga miingon nga igo lang nilang gipahimangnoan ang mga drayber sa ilang pag-agi sa mga dalan sa Mandaue sa ilang dump truck nga nagkarga og basura nga sagad niini walay tabon ug mangatagak pa ang basura sa kadalanan.

Gipanghimakak hinuon ni Basiga nga panimalos sa kagamhanan sa dakbayan sa Sugbo ang ilang gihimo nga nagdili na sa mga 21B nga PUJ sa Mandaue sa pag-agi sa Jones Avenue ug dalan Colon sa dakbayan sa Sugbo.

Matud pa ni Basiga nga ang lakang nga ilang gihimo sa pagdili alang sa pag-agi sa mga trak sa basura sa kagamhanan sa dakbayan ilang gibase sa Republic Act 9003 nga nagmando sa dili pagpataka og labay sa basura.

“Amo lang giawhag ang mga drayber sa trak sa basura sa Cebu City government nga adto sila agi sa dalan nga gawas na sa Mandaue sa ilang paglabay og basura sa dumping area sa Consolacion,” pamahayag pa ni Basiga.    

Dugang pa niya nga ang tulo ka dump truck sa kagamhanan sa dakbayan nga gidakop sa mga eco-warden nga gitahasan sa pagbantay sa kadalanan sa panahon sa kagabhion nakamatikod nga wala kini Environmental Compliance Certificate (ECC) gikan sa Department of Environment (DENR) 7.

Gipasabot usab ni Basiga nga ang maong mga dump truck sa kagamhanan sa dakbayan sa Sugbo wala usab kini mokuha og permit sa kagamhanan sa dakbayan sa Mandaue nga ilang ipakita ngadto sa mga eco warden dihang gihimo ang pagdakop.

Si Basiga miingon nga lakip ang mga bus nga pasaheroan wala magbutang og basurahan sa sulod sa ilang sakyanan. Giisyuhan   og citation tickets nga may multang P500 nga kinahanglang bayran sulod sa 72-oras ug kun mapakyas mosaka pa ang multa niini. (BANATNEWS)