Tinun-an sa Mandaue City College makakuha'g pasulit

CEBU, Philippines - Mipagawas ang korte og temporary restraining order aron makakuha og pasulit sa Licensing Examination for Teachers (LET) ang 30 ka mga tinun-an sa Mandaue City College Tipolo Campus nga gidumala ni Dr. Paulus Cañete.

Si RTC Branch 10 Judge Soliver Peras niadtong Biyernes sa hapon human mosang-at og petisyon ang maong mga tinun-an batok sa pagdili kanila sa Professional Regulatory Commission (PRC) nga makakuha sa maong pasulit karong adlawa (Septiyembre 25).

Una nang namahayag si PRC 7 Director Dan Malaya nga upat lamang ka mga tinun-an sa maong tulunghaan ang makaapil sa maong pasulit base usab sa gimando ngadto kaniya sa Commission on Higher Education (CHED) sa kaulohan.

Si Cañete dihang nahinabi sa Banat News miingon nga dili tiaw ang gibating kalipay sa maong kalamboan sanglit sa katapusan gidungog sa Labaw nga Makagagahom ang ilang pag-ampo nga kahatagan og kahigayonan ang maong mga tinun-an sa pag-apil sa LET sa PRC karong adlawa. Giangkon niyang nagproblema gyud sila nga hikawan ang maong mga tinun-an sa maong pasulit nga unta gradwado man sila sa gidumala niyang tulunghaan.

Matud pa niya nga sa pag-file sa maong mga tinun-an sa ilang application sa LET sa PRC wala sila makasinati og suliran sanglit gidawat na man sa maong buhatan ang P900 gikan sa ilang mga tinun-an isip bayad sa pagparehistro niini. 

Sa nasayran nga ang maong upat ka tinun-an gihatagan og pagtugot sa ulohang buhatan sa CHED human usab makapasar sa validation test nga gipahigayon ni Dr. Susana Cabahug nga maoy tagdumala sa Mandaue City College (MCC) sa Sports Complex Campus. (BANATNEWS)