CEBU, Philippines - Usa ka taxi drayber ang milayat sa iyang taxi human gitionan og armas ug kutsilyo sa duha ka tulisan nga mitulis kaniya kagahapon sa kaadlawon diha sa dalan Sepulvida sa barangay Zapatera siyudad sa Sugbu.
Ang biktima mao si Larry Peconcillo, 57, nagpuyo sa barangay Pooc sa siyudad sa Talisay ug drayber sa Marmic Taxi nga nagtangag sa plakang GXJ-680 nga may body number 1726.
Matud pa ni Peconcillo nga gisakyan siya sa duha ka lalaki nianang alas-4 kagahapon sa kaadlawon diha sa may eskina sa V. Rama ug B. Rodriguez ug nagpahatod didto sa may dalan Sepulvida.
Apan pag-abot sa maong lugar gitionan siya sa duha og armas ug kutsilyo apan nakalayat siya sa taksi ug nangayo og tabang sa mga trabahante sa gitukod nga building diha sa lugar.
Wala na maapsi pa ang mga tulisang mimaneho dayon sa taksi palayo ug hangtud ning pagsuwat sa balita gipangita pa ang maong taksi. (BANAT NEWS)