LBC depositors ug LBC Bank ipatawag

CEBU, Philippines - Mihimo na og inisyatiba si Mayor Michael Rama nga aron matagaan og katin-awan ang mga depositors sa LBC Development Bank busa usa ka diyalogo ang organisahon sa kagamhanan sa dakbayan alang sa maong problema.

Ang tigom himuon sa Rizal Library karong Biyernes ug gituohan nga magbaha ang gatusan ka mga Sugboanong depositors niini.

Matud pa nga dunay mga depositors ang nadismaya pag-ayo ug wala nakahibalo kung unsa ang ilang buhaton ilabi na nga wala sila pahibaw-a sa mga kadagkoan sa LBC Bank nga manirado na diay sila.

Giimbitar sa nahisgutang tigom ang mga representante sa LBC ug Philippine Deposits Insurance Corporation (PDIC) aron matagaan og katin-awan ang mga depositors sa istado sa ilang kuwarta.

Hangtud karon aduna pa’y mga depositors ang kanunay nagbalik-balik sa buhatan sa LBC Development Bank diha sa Gorordo Avenue aron unta mangunsulta apan ang security guard ra ang ilang maabtan.

Matud pa ni Rama nga gituyo niya ang maong diyalogo aron dunay kasandigan ang mga Sugbuanon sa giatubang nga problema karon sa mga depositors.

Gitugyanan na sa mayor sa pagtabang sa mga bank depositors sila si Atty. Manuel Legaspi ug Atty. Jade Ponce.  - BANAT NEWS