CEBU, Philippines - Gisugdan na ang pagtrabaho sa phase 2 sa beautification project sa Siyudad sa Sugbo nga naglangkob sa area nga habig sa buhatan sa Department of Health -7 paingon na ngadto sa Bangko Central ng Pilipinas. Si Mayor Michael Rama kinsa nangulo sa maong groundbreaking ceremony sa miaging adlaw mipasalamat sa tanang mga mitabang sa maong proyekto diin ang private sector nakatampo kaayo og dako ning maong kalihokan.
Sugdan na ang pagpaanindot sa nahisgutang lugar aron dili hikalimtan ang Sugbo kutob sa mga makaduaw dinhi nga taga laing lalawigan ug ilabi na sa mga langyaw. Mapasalamaton si Rama sa Beautiful Cebu Movement Foundation, Inc., nga gipangulohan ni Mariquita Salimbangon-Yeung gumikan kay mao gyud kini ang nangunay sa pagduol sa ubang pribadong tawo nga motabang sa proyekto.
Una na nga gitataw sa mayor nga walay sagol pamolitika ang maong proyekto sanglit usa lang kini ka tabang sa pagpatahom sa palibot sa siyudad. Nasayran nga matag establisamento mihatag sa ilang saad nga moayuda sa pagpatahom sa ilang tugkaran base sa gihatag kanila nga desinyo busa pareho na unya puhon ang landscape sa mga establisamento sa Osmeña Boulevard. (BANAT NEWS)