20 mil ka pamilya ipaseguro sa PhilHealth

CEBU, Philippines - Mokabat sa 20 mil ka mga pamilya sa syudad sa Naga gisaarang ipasiguro sa     Philhealth insurance ni Governor Gwendolyn Garcia. 

Kini ang gitug-an ni Naga Mayor Valdemar Chiong human siya pasaligi sa gobernador sa paghatag sa maong ayuda agi og suporta sa kagamhanan sa lalawigan sa Sugbo sa taga Naga nga nagsaulog sa ika-upat nga Charter Day o kasumaran sa pagkasiyudad sa Naga sa miaging Lunes.

Matud pa ni Chiong nga nalipay kaayo siya sa saad sa gobernador kay lain na usab kining kahigayonan nga makabenepisyo ang taga siyudad sa Naga sa laing programa ni Garcia.

Gipalanog usab ni Chiong ang iyang walay puas nga pasalamat sa gobernador gumikan sa gipakita niining tinud-anay nga suporta sa dakbayan sa Naga.

Matud sa mayor nga sama ni Gobernador Garcia iyang alagaran ang katawhan sa Naga aron nga padayon kining molambo tungod kay ang kalamboan sa siyudad mag-agad sa pakig-alayon sa katawhan.

Apan sa kauswagan sa siyudad way laing mabulahan kundi ang katawhan usab nga katambayayong sa kagamhanan sa pagpalambo niini, matud pa ni Chiong. (BANAT NEWS)