China mobubo og $7.9 bilyones nga negosyo dinhi sa Pilipinas

CEBU, Philippines - Gibutyag ni Presidente Benigno Aquino III nga malampuson ang iyang biyahe ngadto sa China gumikan sa daghan niyang napirmahang kasabotan nga may labot sa pamatigayon tali sa kagamhanan sa China nga mikabat ang tanan og $1.292 ka bilyon ka dolyar.

Sa balita sa ABS-CBN gibutyag ni Aquino sa iyang   arrival speech   sa Ninoy Aquino International Airport sa alas 6:00 pasado niadtong Sabado sa gabii, nga    hilabihang kaikag sa mga negosyanteng taga China nga mobubo og puhonan sa mga dagkong negosyo dinhi sa nasud.

Atubangan sa mga miyembro sa iyang gabinite nga misugat kaniya didto sa tugpahanan nga naglakip kang Kalihim Dinky Soliman sa Social Welfare and Development   ug ni Kalihim Herminio “Sonny” Coloma sa Presidential Communications   Operations Office, ang pamuno nasud mipasabot sa iyang kalipay gumikan sa kaayohang nakab-ot sa iyang biyahe.

Gawas sa $1.282 bilyones nga pamuhonan, may lain pang $3.8 bilyones   nga kantidad sa klaro na kaayong negosyo   ug dili mokubos sa $7.9 bilyones ang katibuk-ang kapital nga   ibubo   sa mga inila na kaayong korporasyon sa China dinhi sa Pilipinas, matud pa sa Pamuno nasud.

Gani ang kauban niyang delegasyon, uban sa 250 ka mga miyembro sa sektor sa negosyo, nakatambong og mikabat sa 36 ka mga miting didto sa China   nga ang tanang gihisgotan gipunting sa maayong negosyo nga ilang padaganon dinhi sa nasud.

Midugang siya nga gawas sa binilyon ka dolyar nga    pamuhonang nakab-ot sa iyang biyahe, nakamugna pa kini   og dugang kalig-on sa kadugtongan tali sa Pilipinas ug China.  - BANAT NEWS