Taga bukid mireklamo kay way health center
CEBU, Philippines - Gipabuhagay sa mga residente sa mga bukirang barangay sa dakbayan sa Toledo ang ilang reklamo sa kakuwang og health center sa lugar ngadto kang kanhi Senador Sonny Osmeña atol sa iyang pagbisita kagahapon.
Ang mga residente nagbitbit sa ilang kabataan aron makapahimulos sa medical mission nga gipasiugdahan ni Osmeña sa tagboanan sa Atlas Commission Farmers Multipurpose Cooperative sa sityo Dumping Site, barangay Loay, dakbayan sa Toledo.
Sulod kini sa kinapusoran sa kanhi Atlas Consolidated Mining and Development Corporation, nga karon gitawag na nga Carmen Copper Corporation, dose ka kilometeros gikan sa ganghaan sa Lutopan.
Matud ni Estrella Lascuna, 36, taga barangay Loay nga moadto gyud sila sa sentro sa dakbayan ug moplete og daku-daku kung ang iyang mga anak adunay gipamati sa ilang lawas.
Ang bana ni Estrella nga si Ruel miingon nga usahay dad-on nalang nila ilang mga anak sa barangay Sinsin nga sakop na sa dakbayan sa Sugbo.
Matud sa magtiayong Lascuna nga aduna silay health center apan walay midwife o bisan social worker nga makaatiman sa ilang kasagarang mga gipamati sama sa ubo, sip-on ug hilanat.
Si Samuel Castillo nga taga barangay Bagacay nagdala usab sa tulo sa lima niya ka anak nga pulos gipanghilantan.
"Maayo unta og magpirmi ni nga adunay mga doctor ang mobisita diri kay aron dili na mi makagasto og dako, usahay ang Carmen mag-ingon ani pod pero dili gyud musulod diri dapita kay layo na kaayo ni," matud ni Castillo.
Kapin sa 400 ka mga residente sa Loay, Bagacay ug Campo 8 ang misalmot kagahapon sa gipahigayon nga medical mission.
Matud pa ni Osmeña sa iyang pagpakigpulong nga nagpaila lamang kini kun unsa kauhaw ang mga residente sa mga bukirang bahin sa Toledo sa mga serbisyo sa panglawas. - BANAT NEWS
- Latest
- Trending