Gabasero gituohang gi-salvage

CEBU, Philippines - Gituohang gi–salvage ang patay’ng lawas sa usa ka gabasero og lubi nga nagbuy-od sa dalan kansang lawas nabulit sa mga samad   pinusilan didto sa Sitio Awihaw ,barangay Sta. Rosa siyudad sa Danao sa miaging buntag.

Ang biktima mao si Abner Vila Bogtae, 31, minyo, molupyo sa barangay Dapdap lungsod sa Compostela usa ka gabasero og lubi.

Si SPO2 Ildefonso Prosia sa Danao City Police mibutyag sa Banat News  nga ang hepe sa tanod nga si Ferancisco Manulat Hermoso maoy nakaagi sa lugar ug unang nakadiskobri sa patay’ng lawas sa biktima nga nagligid   sa dalan hinungdan nga gi-report dayun niya sa kapolisan.

Didto nasuta sa kapolisan nga namatay kini gumikan sa mga samad sa bala sa tibuok niyang kalawasan nga naglakip sa   iyang liog, bukobuko, tiyan tuong paa ug walang paa ug batiis.

Nasayran nga may usa ka bulan nga nag-estar sa maong lugar ang biktima ug wala na kini mopauli sa ilang pinuy-anan.

Daku ang pagtuo sa kapolisan nga gi-salvage ang biktima tungod sa grabi kadaghan sa samad pinusilan nga naangkon niini.

Wala pa usab matino kun unsa ang hinungdan nganong wala na kini mopauli sa iyang pinuy-anan nga maoy usa sa gisubay karon sa kapolisan pagtino kun aduna ba kini mga atraso. (BANATNEWS)