CEBU, Philippines - Usa ka tomboy kinsa giingong gibiyaan sa iyang kapuyo, ug usa ka senior citizen nga naguol gumikan sa iyang sakit nga cancer pulos naghikog sulod sa ilang tagsa-tagsa ka balay sa dakbayan sa Mandaue ug Talisay sa miaging adlaw.
Ang tomboy nailhang si Femelia Balaud, 29, taga sitio Bombil, barangay Mantuyong , dakbayan sa Mandaue; samtang ang senior citizen mao si Sergio Cruz, 65, taga Artville Subdivision, barangay San Isidro, dakbayan sa Talisay.
Si Balaud nadiskobrehan sa kauban niya sa balay sa alas 9:00 ang takna niadtong Biyernes sa gabii nga nagbitay nga wala nay kinabuhi kansang liog gihiktan og pisi nga gigaid sa sagbayan sa kusina sa iyang gipuy-an.
Samtang si Cruz nadiskobrehan sa iyang anak nga nagbitay nga wala na usay kinabuhi nianang alas 9:00 pa sa buntag sa maong adlaw’ng Biyernes usab nga hiniktan gihapon og pisi ang liog niini nga gigaid gihapon sa ilang sagbayan.
Ang mga kabanay ni Balaud misugilon sa kapolisan nga gikasubo niini ang pagbiya kaniya sa iyang gikapuyong babaye, samtang ang kabanay ni Cruz mitug-an usab nga naguol kini sa sakit niyang cancer sa bukog.
Ang duha ka mga naghikog gisuwayan og dala ngadto sa tambalanan sa ilang tagsatagsa ka lugar apan wala na malibre ang ilang kinabuhi.
Ang mga kabanay ni Balaud ug Cruz pulos mitino nga walay foul play ang kamatayon sa ilang minahal sa kinabuhi. (BANATNEWS)