CEBU, Philippines - Tulo ka gidudahang mga mangunguot nga gikan pa sa Cotabato City ang nadakpan sa kapulisan kagahapon sa buntag diha sa barangay Zapatera ning siyudad.
Ang mga nangadakpan mao sila si Jerson Manlangit, 28, Jojo Rudis, 37, and Edgar Rabase, 45, sila nadakpan sa Mobile Patrol Group (MPG) operatives human ilang gibiktima ang usa ka Maribel Balansag.
Balansag, 33, taga lungsod sa Liloan nagsakay og PUJ uban sa mga suspetsado dihang giingong nagtinabangay sa pagkuot sa bag sa biktima.
Si Balansag nga nakabantay misiyagit ug nangayo’g tabang hinungdan nga gialarma sa kapulisan ug ang mga sakop sa MPG nga daling miresponde maoy nakadakop sa tulo.
Si Rudis, nga na-interbyu sa mga tigbalita nagkanayon nga bag-o pa silang naabot dinhi ug miangkong una palang nila nga nadakpan dinhi sa dakbayan.
Ang Theft and Robbery Section (TRS) nagkanayon nga ilaha karung susihon kun duna bay karaang mga kaso ang mga suspetsado dinhi sa dakbayan. (BANATNEWS)