Ama-ama sikop sa kamatayon sa 17-anyos

CEBU, Philippines - Nagtingkagol na karun sa karsel ang ama-ama nga maoy gipasanginlan nga nagbun-og patay sa 17-anyos niadtong Martes sa kaadlawon sa sitio Siphay Tres De Abril barangay Punta Princesa.

Si Richard Perez nga kanhi magtutudlo sa duha ka unibersidad ning dakbayan ang gitumbok sa inahan sa 17-anyos nga iyang stepson maoy mikulata sa bata.

Matud pa sa inahan sa 17-anyos nga si Maylene Mina nga nahinabi sa mga tigbalita nga iya gyud nga gi-angkon nga tungod sa iyang kayawyawan nahilabtan ang iyang anak sa iyang bana nga si Perez.

“Di jud ko mo-deny nga kun wa ko magyawyaw atong higayona di to mabuhat sa akong bana,” pasabot pa ni Mina.

Misaysay si Mina nga sa wala pa mahitabo ang insidente nagsipok ang iyang ulo tungod kay nagkutoy ang ilang mga tiyan ug gani ang iyang anak nangita na og kaon apan nagpaabot pa sila ni Perez.

Mitumaw ang iyang kasapot sa dihang iyang gisugo ang iyang anak nga 17-anyos apan wala kini mituman hinungdan nga iya kini nga natuok. ‘Ako moangkon gyud ko na ako ang nagtuok sa iyang liog, akoa tong marka nga naa sa iyang liog,” matud pa ni Mina apan matud pa niya si Perez maoy misumbag sa biktima tungod sa kapungot.

Butyag pa ni Mina nga wala sila magdahom nga mamatay ang iyang anak tungod kay nagkaestorya paman sila human nila kini madapati hangtod nga kalit kining nagsuka.

Samtang sa bahin usab ni Perez mihimakak sa alegasyon sa iyang asawa batok kaniya sanglit di niya mahimong pasakitan ang biktima kay buotan kini.

Sa pakighinabi sa Banat News ni SPO4 Jay Yballe, Chief Investigator sa Cebu City Police Office (CCPO) Homicide Section mibutyag nga ila nang gi-andam ang kaso nga murder in relation to RA 7610 batok ni Perez.

Giklaro usab ni Yballe nga ang unang estorya nga naglambigit sa hazing usa lang ka mugna nga estorya sa duruha. Giingong dili na apilon sa pagpasaka og kaso si Mina tungod kay himuon kining testigo.

“Dili na tinuod mugna-mugna rana,” matud pa ni Yballe. Ang Banat News nakadawat og text message kabahin sa giingong dili ‘hazing’ ang gikamatyan sa bata kundili pagdagmal sa gipuy-an niini. (EIM) (BANATNEWS)