Mananagat giluba patay sa iyang kontra

CEBU, Philippines - Patay nang nahidangat sa tambalanan ang 52 anyos nga mananagat human kini unaya og dunggab sa iyang gika-inom atol sa pista didto sa sitio Martinez, barangay Pugalo, lungsod sa Alcoy sa miaging gabii.

Ang biktima kansang bukobuko nabuslot agi sa kutsilyo nga maoy gigamit sa pagpanunggab mao si Julio Salmeron, 52, minyo, usa ka mananagat nga nagpuyo sa nahisgutang lugar.

Samtang ang suspek mao si Christopher Catulpos, hingkod, ulitawo, nga taga barangay Pasol Alcoy.

Si PO1 Leon Gesim sa Alcoy Police Station mibutyag sa Banat News nga ang biktima ug ang suspek daan nang nagkabangi apan nahilot ug nagkauli na sila sa maayong kabubut-on.

Apan   nagkakita sila niadtong Sabado sa gabii busa naghimamatay ug nag-inom uban usab sa ilang mga higala.

Apan dihang nangalasbag na sila, nahisgotan ug nabanhaw ang karaan nilang bangi ug dihang miinit na pag-ayo ang ulo sa suspek milanit kini sa iyang kutsilyo dayon gihansak sa buko-buko sa biktima.

Human molukapa sa yuta ug mibuhagay ang daghang dugo gikan sa lawas sa biktima, misibat usab dayon pahilayo sa maong dapit ang suspetsado.

Gihatod usab diha-diha ngadto sa Cardinal Rosales Hospital sa lungsod sa Dalaguete   ang biktima apan gideklarar   kining dead on arrival sa mga doctor.

Padayon pang gipangita sa kapolisan ang suspetsado. (BANAT NEWS)