CEBU, Philippines - Mokabat sa kaping P300,000 nga salapi ang nasakiyo sa grupo sa wala hiilhing mga kawatan gikan sa duha ka balay nga gilungkab didto sa sitio Calderohan sa barangay Casuntingan ug barangay Bakilid, dakbayan sa Mandaue sa miaging gabii.
Si SPO2 Reynerio Patillas sa Presinto 4 sa Mandaue City Police Office (MCPO) nga nagbase sa barangay Casuntingan nga nahinabi sa Banat News miila sa tag-iya sa unang balay nga gilungkab nga mao si Wennie Batiller, 29 anyos, minyo, kinsa nakawatan og P17 mil nga cash , usa ka cell phone ug usa ka laptop computer.
Ang ikaduhang gilungkab mao ang E and J junkshop sa sa barangay Bakilid diin mikabat usab sa P280,000 nga kantidad nga salapi ang nasakiyo sa wala gihapon hiilhing mga kawatan.
Matud pa ni SPO2 Patillas nga si Analie Matedias, hingkod, mitug-an nga giablihan sa mga kawatan ang pultahan sa maong junk shop ug dihang nakasulod na kini gikuha ang salapi gikan sa gisudlang vault niini.
Si SPO2 Patillas miingon nga padayon pa sila karon sa paghipos og dugang kasayoran sa pag-ila sa mga kawatan. - BANAT NEWS