CEBU, Philippines - Napakgang sa mga sakop sa Tourist Police ang suway nga pag-ambak sa usa ka lalaki sa Mandaue-Mactan Bridge kagahapon sa udto.
Sila ni PO1 Jovelito Sesmar ug PO1 Alexander Septimo sakop sa Tourist Police sa Lapulapu City Police Office maoy mitambag ngadto ni Prudencio Quirubin, 23, nga residente sa sitio Seaside, barangay Pajo dakbayan sa Lapulapu sa pagkanaog.
Sayo pa niini mga alas 10:30 kagahapon sa buntag nagkagubot ang pipila ka residente ubos nga bahin sa maong taytayan gumikan kay mitungtong na sa tulay si Quirubin ug buot molayat.
Atol sa imbestigasyon nila ni PO1 Jovelito Sesmar ug PO1 Septimo nasuta nga bag-o lang gibiyaan sa iyang ka-live-in si Quirubin ug sukad niadto kanunay na kining maghinuktok.
Nagduda ang mga kabanay ni Quirubin nga kaguol ug kalibog sa gidangatan niini ang hinungdan nga buot niining maghikog.
Wala hinuon pasakai og kaso si Quirubin ug gihatud kini sa ilang balay ug gipasidan-an ang mga kabanay niini sa pagbantay kanunay niini aron dili na masubli ang insidente.(EIM) (BANAT NEWS)