Mga negosyante suportahan sa Capitol

CEBU, Philippines - Human sa malampusong pag-atiman sa kalikopan ug kadalanan aron molambo ug nindot kining tan-awon, ang programa ni Gobernador Gwendolyn Garcia nga mao ang Expanded Green and Wholesome Environment that Nurtures (EGWEN) Our Cebu Program mopunting na usab sa pagpalambo sa mga negosyo sa kalungsoran.

Sumala pa ni Vice Governor Agnes Magpale nga ilang namatikdan nga ang pipila ka mga programa sa gobernador ilabina sa Obra Negosyo Eskuyla nakatabang sa pipila ka mga gagmay nga mga magpapatigayon gikan sa kalungsoran nga magmalambuon.

Aron mahatagan usab og kahigayonan nga molambo pa ang ubang mga negosyo gikan gihapon sa kalungsoran, kini mitumbok nga ang kagamhanan sa lalawigan sa Sugbo mu-focus sa sunod nga hugna sa Egwen Our Cebu program ngadto na sa mga business and investment.

Si Gobernador Garcia mipakita sa iyang dakong kaikag sa pagpaluyo sa maong plano kay dako kini og ikatabang sa pagpalambo sa mga negosyo sa probinsiya.

Apan gitataw niini nga magkinahanglan pa kini og makuting pagtuon alang sa hingpit nga katumanan sa maong programa. (Chester Abadilla/WC) (BANAT)