Mga babayeng nagpa-hygiene midaghan

CEBU, Philippines - Miusbaw ang gidaghanon sa mga babayeng nagpa-hygiene isip pasiunang gikinahanglan sa ilang pagpanarbaho sa mga balay kalingawan sa dakbayan sa Mandaue gumikan sa kampanya nga gilusad sa buhatan sa city treasurer’s office. Kini maoy resulta sa inspection nga gihimo sa mga opisyal sa maong buhatan kinsa mosuroy sa mga balay kahilayan matag gabii.

Ang hepe sa buhatan sa tresureriya   sa maong dakbayan nga si Regal Oliva nagkanayon nga gituyo nila nga magabii sila mo-inspection kay sa adlaw dili nila hisakpan ang mga manager ug tag-iya   sa mga KTV bar   ug ingon man ang   mga trabahante niini. Matud pa ni Oliva nga ang ilang gihimo nakatabang sa buhatan sa City Health Office (CHO) kay sa iyang nasayran nga sukad nila gihimo ang maong lakang miusbaw ang gidaghanon sa mga babaye nga nagpa-hygiene niining panahona.

Si Oliva mipasabot nga gisiguro lamang nila nga anaa sa tukmang pagbayad sa ilang buhis sa dakbayan ang mga KTV bar, karaoke bar, ug uban pa nga mga balay kahilayan tungod kay daghan niini kanila ang nagkolekta og entrance fee nga P200 ngadto sa P500 sa ilang mga kustomer.

Matud pa niya nga ang gibayad nga entrance fee sa mga customer kinahanglan usab nga makuhaan og buhis kay dako na kining kantidad nga madugang sa panudlanan sa kagamhanan.

Gitataw ni Oliva nga ang unom ka mga kawani sa iyang buhatan kinsa nasakpang nag-inom sa sulod sa VIP room sa gi-inspeksiyon nilang KTV bar sa reclamation area sa dakbayan iyang gipahamtangan og silot.

Midugang siya nga mao kini silbing warning sa uban nga mga kawani sa iyang buhatan nga buot usab  nga molala og bino sa mga lugar nga ilang inspectionon nga dili gayud sila makalikay sa silot nga ipahamtang batok kanila.   - BANAT NEWS