Tabunok market sirad-an sa agosto 29

CEBU, Philippines - Kagamhanan sa dakbayan sa Talisay nakahukom na nga ihinayon karong Agosto 23, 2011 ang pagbalhin sa merkado publiko sa barangay Tabunok ngadto sa barangay Lagtang ug sa Agosto 29, 2011 siradohan na ang karaang merkado.

Si Bise Mayor Alan Bucao nga nahinabi sa Banat News kagahapon mibutyag nga niadtong Miyerkules ang Konseho ug si Mayor Socrates Fernandez nagtigom ug gituki ang pagbalhin sa merkado sa Tabunok ngadto sa Lagtang.

Matud ni Bucao nga palimpiyohan na sa siyudad ang mga dump trucks nga gamiton nga makargahan sa mga vendors sa ilang mga butang sa pagbalhin ngadto sa bag-ong merkado.

Sa Agosto 23 maoy unang adlaw sa pagbalhin ug matapos kini sa Agosto 28 ug sa Agosto 29 siradohan na gyud ang merkdo diha sa Tabunok.

Ang kagamhanan sa siyudad naglaom na nga duna gihapoy mga vendor nga mosupak nga balhinon apan dili nila kini pugson.

Ang kapolisan gimanduan na usab sa siyudad nga ipatuman ang maximum tolerance aron malikayan nga dunay mahitabong kagubot tali sa mga vendors.

Si Bucao nagkanayon nga gipahinumdoman usab nila ang mayor kabahin sa resolusyon sa paghatag og pabor sa mga vendors nga mobalhin sama sa dili una sila paabangon sa ilang mga pwesto sulod sa tulo ka buwan aron maka-adjust sa ilang kita.

Matud usab ni Bucao nga base sa pakisusi ni Konsehal Rodolfo Cabigas ang mga stalls sa fish section sobra kaayo ug pwedeng ang mga ambulant vendors o mga walay stalls diha sa Tabunok makabaton og stalls ngadto sa bag-ong merkado.

Gawas niini gibutyag usab ni Bucao nga ang mga traysikol butangan nila og loading ug unloading sa Tabunok apan ang ilahang paradahan adto na sa bag-ong merkado sa ibabaw nga bahin.

Ang lote nga gihimong bag-ong parking area karon sa Lagtang alang lang kini sa mga delivery van ug sa mga mangomprahay.

Sumala pang Bucao nga gihatag na nila ang tanang mga giyangungo sa mga vendors ug wala nay nakita ang siyudad nga duna pay ikarason ang mga vendors nga dili mobalhin.

Gisupak sa mga vendors sa Tabunok ang pagpabalhin tungod kay maapektahan ang ilang kita, walay klarong parkingan, peligrong lunopan tungod sa kaduol sa sapa sa Mananga, ug uban pa.  - BANAT NEWS