3 gidakop tungod sa pagpanglugos

CEBU, Philippines - Gipasakaan og kasong pagpanglugos ngadto sa Danao Prosecutor’s Office ang tulo ka mga lalaki kinsa gipasanginlang mi-gang rape sa usa ka 27-anyos nga dalaga sa lungsod sa Sogod.

Ang tulo ka mga suspetsado nga nagpanuigon og 27, 28 ug 30-anyos kansang mga pangalan gipugngan usab aron taguon ang pagkatawo sa biktima.

Ang tulo nagtingkagol na sa Cebu Provincial Detention and Rehabilitation Center (CPDRC) human ang kapolisan sa lungsod nakadawat og commitment order sa tulo niadtong Lunes.

Sumala pa nga ang biktima mibutyag nga niadtong Hulyo 26, 2011 sa kaadlawon paingon na siyang mopauli uban sa iyang mga higala gikan sa usa ka disko.

Apan dihang nagbuwag-buwag na sila pagpanglakaw kalit kining giduol sa mga suspek ug giguroy sa usa ka bakanteng balay nga gipanag-iya sa apohan sa usa sa mga rapist.

Ug didto gilugos kini sa mga suspek ug pagkahuman sa krimen midiretso og dangop sa kapolisan ang biktima hinungdan sa pagkasikop sa tulo ug dihang gipresentar ngadto sa biktima positibo niya kining gipang-ila. (BANAT NEWS)