Engr. Fernandez tabangan ni Gwen

CEBU, Philippines - Si Gobernador Gwendolyn Garcia misaad nga motabang nga makakuha og mga trabahoon sa mga proyekto sa kagamhanan sa lalawigan sa Sugbo  ang usa ka Sugbuanong enhenyero nga gidagit sa mga   sakop sa Abu Sayyaf kapin nang usa   ka buwan ang nakalabay didto sa Basilan.

Kini human moduaw sa buhatan   sa gobernador si Engr. Virgilio Fernandez sa miaging adlaw ug mihangyo nga makakuha unta og proyektong ipatrabaho sa Kapitolyo.

Si Fernandez nawad-an og trabaho   human siya dagita sa mga   rebelde apan nasuwertihan siya nga nakalingkawas pa gikan sa mga kamot sa mga sakop sa Abu Sayyaf.

Matud pa ni Fernandez nga gumikan  sa nahitabo kaniya , wala niya mahuman ang iyang mga proyekto didto sa Basilan ug wala siya kabayri sa kagamhanan.

Kun mabayran man siya sa ubang nahuman niya, igo ra usab nga ipamayad niya sa iyang mga supplier nga maoy naghatag kaniya og dakong problema sa panginabuhi karon.

Si Fernandez nagpasalamat sa kagamhanan sa lalawigan gumikan sa walay puas nga suporta niini nga gihatag   kaniya ug sa iyang pamilya.

Nasayran nga si Gobernador Garcia nakahatag usab og hinabang pinansyal ngadto sa pamilya ni Fernandez aron makabiyahi   ngadto sa Mindanao niadtong didto pa siya sa mga kamot sa mga midagit kaniya sa kalasangan sa Basilan. (BANAT NEWS)