CEBU, Philippines - Nabuslot ang tangkogo ug milapos ang bala sa aping sa usa ka ulitawo human kini pusila sa iyang kontra didto sa diskohan sa barangay Kawit sa lungsod sa Medillen kagahapon sa ala 1:20 sa kaadlawon.
Ang biktima mao si Luis Osabe, 36, ulitawo, way klarong trabaho nga taga barangay Mahawak, sa maong lungsod, samtang ang suspek mao si Jinggo Cabucos, hingkod, ulitawo, nga taga barangay Antipolo, Medillen.
Si SPO2 Edre Ortega sa Medillen Police Station mibutyag sa Banat News nga ang biktima naglingkod sa gawas sa koral sa diskohan nga misaksi sa mga nagsayaw dihang kalit lang gidul-itan sa suspek og armas de fuego ang iyang tingkoy dayon pabuto niini.
Ang bala milahos sa iyang walang aping gikan sa iyang tangkugo nga maoy nakapahagba kaniya sa yuta.
Gihatod dayon ang biktima ngadto sa Verallo District Hospital sa siyudad sa Bogo apan gibalhin usab dayon kini sa tambalanan sa dakbayan sa Sugbo.
Samtang ang suspek padayon pang gipangita sa kapolisan human kini mosibat.
Wala pa hisayri sa kapolisan ang hinungdan sa maong pagpamusil apan nakadawat sila og taho nga dugay nang nagkabangi ang biktima ug ang suspek. (BANAT NEWS)