Negosyanteng bakol gitulisa'g P20 mil

CEBU, Philippines - Nadagit ang P20 mil nga salapi sa usa ka negosyanteng may apan sa panglawas didto sa dalan Plaridel sa barangay Umapad, dakbayan sa Mandaue sa miaging buntag.

Si SPO2 Juan Calamba sa Presinto 5 sa kapolisan sa Opao Police Station sa Mandaue City Police Office (MCPO) nga nahinabi sa Banat News miingon nga ang biktima nga wala magpaila sa iyang ngalan naglingkod sa iyang welchair atubangan sa iyang tindahan sa maong lugar dihang kalit lang mihunong ang usa ka motorsiklo nga giluwanan sa duha ka wala hiilhing lalaki.

Ang biktima nagkanayon nga ang angkas sa luyo niini maoy miduol kaniya ug milabni sa iyang belt bag nga gisudlan sa kapin P20, 000 nga salapi.

Matud pa ni SP02 Calamba nga ang biktima nga nakalitan mihiwasa ug mibadlong sa kawatan apan nahilom usab dayon dihang gidul-itan siya sa armas de fuego sa tulisan.

Dayon misakay kini og balik sa motorsiklo ug mipabulhot pahilayo sa maong dapit. Si SP02 Calamba miingon nga ang mga silingan nga gipangayoan og tabang sa biktima migukod sa mga tulisan apan wala nila kini hiapsi.

Padayong gipangita sa kapolisan ang maong mga tulisan ug ang biktima naulaw sa pagbutyag sa iyang ngalan.  - BANAT NEWS