Mga drayber managlahi'g prinsipyo bahin sa merkado

CEBU, Philippines - Ang presidente ug bise presidente sa kahugpongan sa mga traysikol sa dakbayan sa Talisay managlahi og baroganan bahin sa bag-ong merkado sa barangay Lagtang.

Base sa report sa DyAB Abante ba Bisaya nasayran nga si Boy Bihag ang presidente sa kahugpongan sa mga traysikol mipahayag nga mayoridad sa iyang mga sakop pabor nga ibalhin ang merkado publiko ngadto sa Lagtang gikan sa Tabunok.

Samtang ang Bise presidente nga si Mario Menyamin kinsa maoy nag-organisar sa rally kagahapon sa buntag nga gitambongan sa 200 ka mga drayber, nagkanayon nga 80 porsyento ngadto sa 90 porsyento sa mga drayber sa traysikol supak nga balhinon ang merkado ngadto sa Lagtang.

Ang siyudad adunay kapin 1,500 ka lihitimong traysikol sa dakbayan, samtang may 4,000   nga namasahero sa maong dakbayan nga dili taga Talisay.

Ang maong rally didto himoa sa atubangan sa bag-ong merkado sa Lagtang nga mipasidaan sa publiko kalabot   sa kapeligro sa maong merkado gumikan kay daplin kini sa sapa ug gamay ra usab kaayo ang parking area.

Unya wala nay pasaherong mosakay kanila kay wala nay mangomprang mga tawo sa maong merkado sa Lagtang, dugang pa ni Menyamin.

Apan si Bihag sa laing bahin mipasabot nga layo ra kaayo sa tinuod ang gipahayag ni Menyamin kay bisan gamay ang parking area sa bag-ong merkado, apan dili maghuot ang traysikol didto kay di man magpundo sulod sa 24 oras ang maong mga sakyanan kay magpunay man kini og hakot og pasahero.

Sayo niini si Bise Mayor Alan Bucao mipasabot nang daan nga tungod kay gamay ra ang parkinganan sa traysikol sa bag-ong merkado naghimo usab sila og sistema nga sakar niini.   - BANAT NEWS