Negosyante'g ligid nadunggaban angol

CEBU, Philippines - Usa ka negosyante gidunggab angol sa duha ka kriminal didto sa dalan Gov. M. Cuenco Avenue sa barangay Banilad siyudad sa Sugbo sa miaging gabii.

Ang biktima mao si Mark Valencia Cuvilla, alyas ‘Lawrence’ 21, ulitawo, negosyante og ligid , samtang ang suspek mao si Joe Marie Carina, 18, ug ang kauban niining   ginganlan og Daryl nga taga dakbayan sa Mandaue .

Subay sa imbestigasyon sa kapolisan nasayran nga naglakaw sa maong lugar ang biktima uban sa iyang hinigugma nga si Hannah Gil Lesin dihang kalit lang mitungha ang duha ka suspetsado dayong dunggab sa biktima sa walay igong hinungdan.

Human matumba ang biktima gumikan sa samad dinunggaban sa iyang buko-buko, gipusposan pa siya og bato ug botelya. Maayo nalang kay nanagan ang mga suspetsado ug gibiyaan ang biktima.

Ang mga sakop sa Miscellaneous team sa Mabolo Police station nga sila si PO2 Mario Agda ug PO2 Disodado Parejas mipahigayon og follow-up operation ug ila dayong nadakpan ang duha ka suspetsado .

Selos ug gang-gang nga isyu maoy gisubay nga anggulo sa kapolisan sa ilang padayon nga imbestigasyon sa maong hitabo. Samtang ang mga suspetsado nagpahayahay na karon sa prisohan sa Mabolo. (BANAT NEWS)