200 ka tawo papahawaon sa luna nga ilang gipuy-an

CEBU, Philippines - Mokabat sa 200 ka molupyo sa 1.3 ka ektaryang luna sa barangay Tabok, dakbayan sa Mandaue ang posibleng mahiklin tungod sa pagtumaw sa usa ka Chinese nga babaye ug miangkon nga maoy nanag-iya sa maong luna nga ilang gipuy-an sulod sa 20 ka tuig nga gidugayon.

Ang nangangkon nga tag-iya sa maong luna mao si Maria Paz Lim nga gikuwestiyon usab sa maong gidaghanon sa mga molupyo sanglit mao may ilang pagtuo nga gipanag-iya kini sa gobyerno.

Si Lim miingon nga nagbinugtong siyang sumosunod sa maong luna pinasikad usab sa kamandoan sa korte. Ang kamandoan ni Judge Sylvia Aguirre Padiranga sa Regional Trial Court (RTC) 7 nga giluwatan niadtong Nobyimbre 20, 2007 gipasikad usab sa “last will and testament” sa namatay niining bana nga si anhing Henry Ngo Lim.

Sa maong last will and testament sa namatay niining bana mihingalan sa lima ka mga kabtangan nga naglakip na niining gipuy-an sa 200 ka mga molupyo. Gikuwestiyon sa mga molupyo ang pagpangangkon ni Lim sa 1.3 ka ektaryang luna sa dakbayan sa Mandaue sanglit ang mga kabtangan nga gihinganlan sa last will and testament sa namatay niining bana atua man mahimutang sa barangay San Roque sa dakbayan sa Sugbo.

Apan ang abogado ni Lim nga si manlalaban Salvador Solima sa iyang pagpasabot miingon nga wala na lamang itumbok ang mga nahimutangan sa maong mga kabtangan.

“That properties not specifically mention full under the clause,” ni Solima pa. “And also other properties real and personal wherever located.”

Nunot niini nakigtagbo si Solima sa mga molupyo sa maong luna ug gitanyag ang pagbaligya na lamang sa maong luna ngadto sa mga nag-ukopar sa kantidad og P2,500 ang matag metro kuwadrado.

Sa maong tanyag gipangayo ni Lim ang 10 porsiyento gikan sa kinatibuk-an nga kantidad isip pasiunang bayad ug ang mahibilin maoy pabayran niya og data-data sulod sa upat ka tuig.

Apan niining tuiga, 2011 gipakubsan ni Lim ang presyo ngadto sa tag P2,000 nalang matag metro kuwadrado apan kinahanglang impason sulod sa unom ka bulan.

Sa maong tanyag ni Lim adunay pipila nga nanghatag sa ilang pasiunang bayad human makapirma sa usa ka kasabotan.

Apan ang uban nagpanagana sa pagbayad dihang ilang nadiskobrehan ang Certificate of Title sa maong luna nga wala magdala sa ngalan ni Henry Ngo Lim kun dili iya ni Antonio Lim Tanhu nga naminyo usab ngadto ni Dy Ochay nga molupyo sa barangay Tipolo, dakbayan sa Mandaue.

Nagpakita usab sa laing dokumento nga gipanag-iya kaniadto sa gobyerno ubos sa Philippine Railway Co. (BANAT NEWS)