CEBU, Philippines - Kanhi sakop sa Scout Ranger sa Philippine Army nga gipasanginlang namaligya og ilegal nga drugas nasikop sa kapolisan atol sa buybust operation sa barangay Alang-alang dakbayan sa Mandaue sa milabay’ng gabii.
Wala mosaler si Glecerio Larobis, kanhi sakop sa Philippine Army Special Forces nga Scout Ranger sa mga sakop sa Mandaue City Police Office –City Anti-Illegal Drugs Special Operations Task Group nga gipangulohan ni Insp. Hendrix Bancoleta nga maoy miaresto kaniya.
Sumala pa nga dugay nang gipanid-an sa kapolisan si Larobis sukad nga nakadawat sila og impormasyong namaligya kini og illegal nga drugas hangtud nga kini gipalitan sa mga awtoridad og shabu atol sa operasyon.
Pagkahuman sa transaksyon dali kining gikwelyohan sa kapolisan ug nakuha gikan kaniya ang 200 pesos nga buybust money ug 19 ka mga gagmay’ng pakete sa gituhoang shabu. Nasuta usab sa kapolisan nga nasikop na si Larobis sa kaso sa illegal nga drugas sa dakbayan sa Sugbu apan na-dismiss ang kaso niini sa milabay’ng tuig.
Samtang ang kapolisan mipasaka na og kasong kalapasan sa RA 9165 ubos sa Sec. 5, II ug 12 sa Art. II gumikan sa pagpamaligya og illegal nga drugas. (BANAT NEWS)