Daang merkado gihimong garden

CEBU, Philippines -  Usa na ka garden sa mga utanon ang karaang merkado sa dakbayan sa Mandaue nga napahimuslan na sa mga opisyal nga nagdumala sa merkado publiko sa maong dakbayan.

Kining maong garden anaa sa ikaduhang andana sa edipisyong nasunog niadtong Enero 30, 2005.

Sukad biyai sa kagamhanan ang paggamit sa maong merkado nahimong abuno ang mga nalata nga mga utanong baligya kaniadto, kay dapit man sa utanon ang maong lugar.

Apan ang makita karon dili na mga utanong lawos, kundili mga utanon nang lab-as kaayo ug tambok nga naglakip sa tawong, sibuyas, tamates kamote, tangkong , ug uban pa.

Matud pa ni Mosolini Suliva, pangulo sa 100 ka mga kawani nga gipiyalan sa kagamhanan sa dakbayan sa pag-atiman sa merkado, nga napuslan nila ang mga basura sa utanon kaniadto nga gipalata sa ikaduhang andana sa merkadong karaan.

Matud pa ni Suliva nga gipakita nila sa taga Mandaue ang ka-epektibo sa programa ni Mayor Jonas Cortes pagdasig sa mga molupyo nga mogama og “backyard gardening”.

Kini sa tinguha nga imbis sa merkado sila mamalit og mga utanon sama sa kamunggay, agbate, tawong, gay sa kamote, tangkong ug uban pa, mahimo ra kaayo nga anha kuhaa matag adlaw sa likod sa balay basta magkugi lang.

Miingon si Suliva nga ang garden sa utanon sa karaang merkado mahimong bintana sa mga taga Mandaue nga masil-ing nila ug kapanig-ingnan sa himoon nilang garden sa mga utanon sa ilang likoran sa balay.

Kay usa sa labing mahinungdanon sa pagsagop ning maong matang sa garden mao ang sustansya nga idulot sa lab-as nga mga utanon ngadto sa lawas sa tawo gikan sa bata hangtod sa mga hamtong ug edaran.

Apan matud pa ni Suliva nga dili lang kutob niana, kay labaw sa tanan ang usa sa kapuslanan sa backyard gardening   mao ang mga basura nga malata dili na kinahanglang ilabay pa sa layo kay magamit man kaayo sa backyard garden sa matag   pamilya.

Gani ang garden karon sa merkadong karaan nakapakunhod pag-ayo sa basurang malata nga iglalabay sa dakbayan ngadto sa labayanan niini.

Ang basura sa Mandaue matag adlaw may gidaghanon nga 6 toneladas apan ang maong gidaghanon mikibra karon og l.5 toneladas matag adlaw kay ang mga basurang malata anaa naman lang ilabay sa merkadong guba aron iabuno sa garden sa mga utanon matud pa ni Suliva. (BANAT NEWS)