CEBU, Philippines - Tungod sa bangi bahin sa yuta, napusilan ang usa ka tawo sa iyang silingan sa Zone Gabi, sa barangay Paknaan, dakbayan sa Mandaue sa miaging gabii.
Ang biktima mao si Cyrus Alfafara, 33, samtang ang suspetsado mao si Willy Canen, 38 , pulos minyo, ug mga molupyo sa maong dapit.
Si SPO1 Danilo Barrita sa kapolisan sa Presinto 3 sa Basak Police Station sa Mandaue City Police Office (MCPO) mibutyag sa Banat News nga daan nang nagkabingkil ang biktima ug ang suspetsado tungod sa yuta nga gibaligya sa amahan sa suspetsado ngadto sa amahan sa biktima. Matud pa ni SPO1 Barrita nga gumikan sa maong kaso, nasuko ang suspetsado nga gikasuko usab sa biktima nga miresulta sa pag-atubang nila ug gihusay sila sa kapitan sa barangay Paknaan.
Dugang pa ni SPO1 Barrita nga sa miaging Sabado sa gabii kalit lang mitumaw ang biktima nga hubog sa atubangan sa suspetsado kinsa nakig-inom usab sa iyang mga higala.
Tungod kay daan nang nagkabangi, nagsinukmatay ang duha ug dihang misilaob na pag-ayo ang kapungot sa suspetsado milanit kini sa iyang armas de fuego ug gipusil ang biktima.
Gumikan sa mga samad sa nagkalainlaing bahin sa lawas, daling gihatod ang biktima ngadto sa Cortes General Hospital sa maong dakbayan apan gibalhin kini ngadto sa Vicente Sotto Memorial Medical Center sa dakbayan sa Sugbo.
Samtang padayon pang gipangita sa kapolisan ang suspetsado human kini mosibat. (BANAT NEWS)