CEBU, Philippines - Gikalipay ni Lapulapu City Mayor Paz Radaza ang ulahing kalambuan sa ilang tinguhang makakolekta og buhis sa Mactan-Cebu International Airport nga sa dugay’ng panahon wala mabayri.
Ang dakbayan buot nga maningil sa P1.3 bilyones nga buhis nga sumala pang Radaza ang MCIA buot mobayad niini pinaagi sa ‘tigi-tigi.”
Mihangyo usab ang MCIA nga dili lang pabuhisan ang runway. Atol sa gipahigayong committee hearing sa Committee on Government Enterprise and Privatization and on Transportation sa hawanan sa kongreso nasuta ni Radaza nga buot i-exempt sa maong komitiba ang pagkuha og buhis sa runway gumikan kay gigamit kini sa publiko sama sa mga kadalanan.
Ang bayranan sa MCIAA maglangkob nalang sa Terminal Building , airfield, taxiway ug uban pang lugar nga ginegosyo sulod sa maong tugpahanan.
Gumikan niini nalipay si Radaza sa maong kalambuan ug buot kini nga makigkita ngadto ni MCIAA General Manager Engr. Paul Villarete alang sa panagsabot-sabot.
Ang resulta unya sa ilang masabutan ilang isumiter ngadto sa komitiba sa kongreso nga maoy nagdungog sa maong issue.
Matud pa ni Radaza bisan og sa tigitigi nga paagi ang pagbayad sa MCIAA sa ilang buhis dako kini og ikatabang sa koleksiyon sa dakbayan sa Lapulapu alang sa pagsanong sa mga priority projects sa dakbayan.
Kahinumduman nga sukad sa tuig 2003 hangtod ning tuiga mokabat na sa P1.3 bilyones ang utang sa MCIAA ngadto sa dakbayan sa Lapulapu gikan sa ilang business tax ug real property tax. (BANAT NEWS)