Bag-ong pangulo sa DWUP gisaway

CEBU, Philippines - Gihulagway ni Bise Mayor Joy Augustus Young nga dili kwalipikado ang bag-ong head sa Department for the Welfare of the Urban Poor (DWUP) nga si Atty. Collin Rosell gumikan kay wala kini pagbati sa mga kabos.

Matud pa sa bise mayor nga iyang nakita kang Rosell nga basta lang mopakanaug og hukom nga walay kaluoy sa mga kabos. “Kung hisgutan ang educational background, makapasar man siya, apan gikinahanglan gyud nga duna siya’y kasing-kasing sa mga kabos,” suma pa ni Young.

Kahinumduman gi-aprobahan ni Mayor Michael Rama ang rekomendasyon ni Rosell sa dili pag-renew sa 15 ka mga empleyado sa City Hall nga nadestino sa DWUP kung diin ang kontrata niini na-expire niadtong Hunyo 30.

“Kinahanglan nga tagaan unta niya og igong time, bisan usa ka buwan lang nga obserbahan og balik ang performance sa mga empleyado,” matud pa ni Young.

Una na nga gipadayag ni Rosell kaniadto nga wala makapasar ang maong 15 ka empleyado sa gihimo nila nga evaluation sa ilang performance sa trabaho.

Giklaro usab ni Rosell nga wala’y kalabotan sa politika ang wala nila pag-renew sa 15 niya ka mga tawo.

Nasayran nga mitumaw ang mga pagduda nga loyal nga supporters sa Bando Osmeña Pundok Kauswagan ang maong mga empleyado.

Ang maong grupo gipangulohan ni Kongresista Tomas Osmeña nga usa sa gikabangi karon ni Mayor Rama.

Apan depensa pa ni Rosell nga dili kini angayan himuong isyu, gani dunay mga supporters sa BOPK ang kasamtangang nagtrabaho gihapon karon sa DWUP.

Ang mga empleyado sa DWUP nga wala gi-renew sukad niadtong Biyernes naglangkob nila ni Cynthia Luces, Pio Mergal, Sarah Wee, Jemar Frias, Filomena Lumagay, Imelda Remuete, Gerardo Vano, Wilbert Alo, George Luces, Edmund del Puerto, Romeo Orocay, Romulo Ababa, Elbeth Perez, Enan Navotas ug Calixta Abella.  (BANAT NEWS)