Gumikan sa komedya welder nalubaan

CEBU, Philippines - Gumikan sa komedya nalubaan sa gunting ang usa ka welder dihang nasuko kini sa pasiaw sa iyang kauban sa trabaho sa usa ka welding shop sa sitio Tangkong, barangay Gun-ob, dakbayan sa Lapulapu sa miaging hapon.

Ang biktima mao si Noel Alpuerto, 33, ulitawo, usa ka welder, samtang ang suspetsado mao ang nailhan lang sa ngalang Junjun Tampus, 30, ug kauban sa trabaho sa maong dapit.

Si SPO1 Manolito Abellanosa sa homicide section sa kapolisan sa maong dakbayan miingon nga gikomedyahan lang sa biktima ang suspetsado nga maoy paweldingon sa usa ka   trabahoon nga wala pa niya masinatii.

Apan gikasuko kini sa suspetsado nga misangpot sa mainiton nilang lalis.

Ang suspetsado nga nahutdan na sa pasensya milanit sa usa ka gunting gikan sa iyang bulsa ug walay kukalooy nga mihansak niini sa bukobuko ug bukton sa biktima.

Ang biktima gihatod dayon ngadto sa Lapulapu District Hospital apan gibalhin kini sa Vicente Sotto Memorial Medical Center sa dakbayan sa Sugbo.  (BANAT NEWS)