Polis seminaron bahin sa curfew ordinance

CEBU, Philippines - Giplano ni Mandaue City Police Office (MCPO) Director Noel Gillamac nga ipaubos sa training seminar ang iyang mga sakop alang sa pagpatuman sa curfew ordinance nga gilig-on sa kagamhanan sa dakbayan.

Si Senior Supt. Gillamac miingon nga mahinungdanon kaayo ang maong seminar sa iyang mga sakop aron kalikayan ang unsa mang kakulian sa pagpatuman sa maong balaod.

Matud pa niya nga makatabang kaayo ang curfew ordinance sa dakbayan sanglit ang pagdili sa mga menor de edad nga magsuroysuroy panahon sa gabii maoy usa ka paagi aron malikay sila gikan sa mga daotang elemento.

Sa samang higayon malikay usab sila sa pagkalambigit sa unsa mang krimen uban sa mga barkada niini.

Si Gillamac miingon nga bisan ang mga barangay tanod nga maoy kaabag sa kapolisan sa pagpatuman sa maong ordinansa , gusto usab niya nga makatambong sa maong seminar. Matud pa niya nga dumalahon sa mga kawani sa Department of Social Welfare and Development (DSWD) ang training seminar alang sa hapsay nga pagpatuman sa curfew ordinance.

Sa maong ordinansa higpit nga gidid-an ang mga batan-ong nag-edad og 17 anyos paubos sa paggawas sa ilang balay taliwala sa alas 10:00 sa gabii ug alas 4:00 ang takna sa kaadlawon.

Hinuon gitugotan ra nga makagawas sa balay ang hingtungdan kun kauban niini ang iyang ginikanan.

Sa samang higayon ang mga ginikanan maoy papanubagon sa balaod kun madakpan ang ilang anak nga batan-on gumikan sa paglapas sa balaod sa curfew.  (BANAT NEWS)