Desperado giluwas

Manila, Philippines - Sa usa ka talagsaong panghitabo, usa ka desperadong lalaking buot untang maghikog tungod sa mga problema ang naluwas gikan sa tinong kamatayon human makombinsir sa kaniadto gibansagang badlungon sa katilingban nga si Joavan Fernandez.

Ang kaniadto Joavan Fernandez nga kanunay lang mapatik sa mga pamantalaan tungod sa mga kalapasan sa balaod ug uban pang kontrobersiya ning nanglabay’ng mga adlaw daw nag-usab na.

Niadtong milabay’ng Huwebes sa gabii, usa ka Ricky Marlon Bartolata, 34, nga residente sa barangay Dumlog sa dakbayan sa Talisay napugngan ni Joavan sa pagpakamatay pinaagi sa paglayat sa Mananga Bridge habig sa barangay Dumlog, dakbayan sa Talisay.

Si Bartolata nga usa ka drayber sa traysikad nga nahinabi sa Banat News nagkanayon nga tungod sa kalisod sa panginabuhi maong nakahuna-huna nalang siya og pakamatay.

Gibutyag ni Bartolata nga sa wala pa siya mosaka sa barandilya sa tulay nag-inom una siya hangtud nga nahubog, matud pa niya ang bino lamang ang iyang daganan sa iyang mga problema.

Ug dihang nahurot na niya ang usa ka lapad nga bino mipatong siya diha sa barandilya sa tulay aron unta moambak apan naagian siya ni Joavan kinsa mibadlong kaniya.

Dihang iyang gitug-anan sa iyang planong pagpakamatay giingong gialam-alaman siya ni Joavan aron mokanaog, human sa panag-estorya nila ni Joavan nakumbinsir siyang atubangon ang iyang mga problema ug dili solusyon ang paghikog.

Si Joavan sa iyang bahin nga nahinabi sa mga tigbalita nagkanayon nga niadtong higayona nag-roving siya tungod kay gisugo siya sa iyang amahan nga si Mayor Socrates Fernandez sa pagpaniid sa mga mangubkob og mga balas diha sa sapa.

Matud ni Joavan nga mao na lay iyang nakit-an si Bartolata nga nagpatong na sa barandilya ug nakuyawan siyang mahagbong kini hinungdan nga midali siya og kanaog gikan sa iyang sakyanan ug gialam-alaman si Bartolata aron mokanaog ug nagpaila siya niini.

Gibutyag ni Joavan nga dunay mga tawo diha sa palibot apan igo lang nagtan-aw ug wala mobadlong kang Bartolata tungod sa kabalaka nga moambak unya kini ug silay mapasanginlan.

Dihang nanaog na si Bartolata gikan sa barandilya daling nanawag og mga polis si Joavan ug ang nagpatrolyang sila si SPO1 Elmer Saladas, PO3 Roelito Tano, PO2 Jason del Campo ug PO2 Antonio Asoy Jr. maoy daling miresponde.

Matud ni PO3 Tano nga si Bartolata ilang gipakaon sa wala pa nila kini dalha sa police station tungod kay mireklamo kining gigutom. Gibana-bana sa nahisgutang polis nga dunay 20 feet ang gihabogon sa tulay paingon sa kabatuhan diha sa ubos nga gihulagway nilang kung miambak gyud si Bartolata siguradong mabuak ang ulo niini ug mabali-an sa kabukogan.

Ug kung matugpa usab sa tubig sa sapa siguradong malumos si Bartolata tungod sa kakusog sa sulog nianang gabhiuna.

Si Coleen Inajada, Social Welfare Officer I, sa dakbayan sa Talisay kinsa maoy miatiman kagahapon sa buntag kang Bartolata sa pakighinabi sa mga tigbalita mibutyag nga base sa ilang imbestigasyon si Bartolata gisagop sa iyang mga apohan kaniadto apan ang mga apohan niini pareho nang mitaliwan.

Ang pagpamasahero og traysikad ug pagtabang-tabang og silhig diha sa barangay hall sa Dumlog mao ray pangita niini aron makakaon.

Gibutyag usab ni Inajada nga si Bartolata “unwanted” kini sa iyang pamilya ug gani ang kabilin nga balay sa iyang mga apohan gipaabangan sa iyang inahan apan giingong wala hatagi og bahin si Bartolata sa abot sa abang sa balay.(EIM) (BANAT NEWS)