CEBU, Philippines - Mikabat og 3,000 ka mga opisyal ug kawani sa kagamhanan sa dakbayan sa Mandaue ang miduyog sa tree planting sa dakbayan sa miaging Sabado.
Gipangunahan ni Mayor Jonas Cortes ug Bise Mayor Glenn Bercede, ang pagpananom og mga nagkalainlaing lubangon sa kahoy sa kalasangan gihimo didto sa daplin sa Butuanon River. Tungod kay matag usa gipatisok man og tagsa usab ka kahoy, mikabat usab og tulo ka libo ka mga lubangon ang natisok sa maong higayon.
Apan una nila ipananom ang maong mga lubangon, daan nang gidestinohan sa kagamhanan og mga tawo nga suweldohan aron maoy moatiman hangtod nga modagko ang maong mga tanom sa daplin sa sapa sa Butuanon.
Usa sa gitinguha sa kagamhanan sa dakbayan mao ang paghatag og proteksyon sa kalikopan sa dakbayan.
Kauban nila ni Mayor Cortes ug Bercede, mao ang mga opisyales sa barangay, mga pribadong grupo, ingon man mga opisyal ug kawani sa mga ahensya sa nasudnong kagamhanan nga nagbase sa Mandaue. Hapsay kaayo ang pagpananom tungod kay gibahin sa tulo ka grupo ang mga misalmot sa maong kalihokan.
Ang maong kalihokan maoy pakighiusa sa dakbayan sa Mandaue sa “Run 2 Plant 4 Greening Philippines 2011” nga gilusad sa Ramon Aboitiz Foundation Inc.(RAFI) ug gisuportahan sa kagamhanan sa lalawigan sa Sugbo sa pagpanguna ni Gobernador Gwendolyn Garcia.
Si Assistant City Agriculturist Roberto Tiro nga maoy coordinator sa maong kalihokan miingon nga pulos mga mahalon ug lig-ong matang sa kahoy ang ilang gipananom.
Naglakip sa mga seedling sa kahoy nga ilang gitanom mao ang Bankal, Hambabalod, Lomboy, Pangatoon, Patikan, Lawaan, Tugas ug uban pa. (BANAT NEWS)