Bayan Muna mibabag sa proyekto lungsod sa Medellin

CEBU, Philippines - Nadismaya ang mga konsehal sa lungsod sa Medellin sa mga miyembro sa Bayan Muna tungod kay mao kini ang usa sa nakababag sa ilang pag-ugmad sa Gibitngil island nga gihimo nilang usa ka tourist destination.

Kini tungod kay  gituohan nga ang maong grupo sa partylist mopasiugda og protesta aron babagan ang tourism development sa lungsod.

Matud pa ni Bise Mayor Juan Alfonso Lim sa maong lungsod nga dako ang ilang pagtuo nga ang mga sakop sa Bayan Muna maoy nagsulsol sa mga dili mominus 50 ka mga tawo pagbabag sa mga giplano nga kaugmaran alang sa turismo sa lungsod   sa katarungan nga maapektahan kuno ang ilang panginabuhi.

Gipasabot ni Lim nga sayop kaayo ang maong kasayoran kay inay madaot ang ilang panginabuhi, molambo ug moluag hinuon kini   tungod sa mga turista nga magdasok adlaw-adlaw sa maong lugar.

Matud pa ni Lim nga kun anaa ang daghang turista sa maong dapit modaghan usab ang kuwarta sa mga molupyo kay ang mga turista nagkinahanglan man og serbisyo sa katawhan.

Gipahibawo ni Lim nga ang Gibitngil tourism development mao unta ang ilang proyekto nga magsilbi nilang halad ngadto kang Gobernador Gwendolyn Garcia tungod sa walay puas nga paghatag og suporta niini sa lungsod sa Medellin.

Matud pa niya   nga tungod sa pag apil- apil sa kahugpongan sa Bayan Muna napakgang ang pagpalambo sa turismo sa ilang lungsod.

Dugang pa ni Lim nga kung mahuman ang maong proyekto dako kaayo kini og ikatabang sa paglambo sa ekonomiya sa ilang lungsod ilabina sa mga molupyo sa isla sa Gibitngil nga maoy labing unang makapahimulos sa maong proyekto. (BANAT NEWS)