Kalisod maoy sagad rason nga dunay pagpangabuso

CEBU, Philippines -  Mga kaso kabahin sa pangabuso sa kababayen-an ug menor de edad kasagarang hinungdan mao ang kalisod sa pamuyo sa pamilya ug uban sa maong kaso wala masang-at ngadto sa korte tungod kay ang nakahimo og kalapasan kasagaran paryente lang o mga bana ug amahan.

Si Felipa Solana, hepe sa City Social Welfare sa dakbayan sa Talisay sa pakighinabi niini sa Banat News kagahapon nagkanayon nga kasagaran sa kaso kabahin sa pangabuso sa kababayen-an ug kabataan mahitabo tungod kay walay klarong panginabuhian ug ang kabataan maamong sa away sa ginikanan.

Sa maong sitwasyon kasagaran sa mga biktima dili mopasaka og kaso batok sa suspetsado tungod kay ilaha man kining bana o amahan.

Apan dunay mga samang insidente nga masang-at gyud sa korte kung ang nalambigit nga suspetsado uyoan o silingan sa mga biktima.

Gawas sa mga kaso sa pagpamun-og dunay mga kaso usab sa pagmolestiya ug pagpanglugos ingon man human trafficking sa dakbayan sa Talisay.

Base sa talaan sa city social welfare sa unang kwarter ning tuiga mikabat ngadto sa 22 ka mga menor ang nabiktima sa pagpangabuso, lima niini sexual abuse, physical abuse o pagpamun-og ug duha ang nabiktima sa trafficking.

Apan 12 ka mga menor de edad ang nalambigit usab og mga krimen niining tuiga.

Walo ka mga babaye ang nabiktima sa pagpamun-og sa ilang mga bana apan ang maong kaso wala masang-at ngadto sa korte, upat ang kasong acts of lasciviousness sa mga menor ug tulo sa pagpanglugos diin duha sa mga biktima menor de edad ug ang kaso nasang-at na ngadto sa korte.

Kabahin sa human trafficking, matud ni Solana nga sagad sa hinungdan mao ang kalisod sa pamuyo sa pamilya hinungdan nga ang mga menor mahaylo o mapugos pagpanarbaho.

Base usab sa talaan sa CSWD sa tuig 2010 mokabat sa 14 ka kaso sa pagpanglugos, duha ang acts of lasciviousness ug siyam ang pagpamun-og diin ang mga biktima niini mga menor, hinuon napasaka ang tanang kaso ngadto sa korte.

Sa maong tuig usab 27 ka mga kaso ang natala diin ang mga suspetsado niini mga menor de edad. Usa sa maong mga kaso ang pagpanglugos nga naduso ngadto sa korte, 21 ang theft diin 16 niini gi-refer ngadto sa CSWD ug ang lima nahusay lang diha sa kapolisan, lima ang robbery pulos gi-refer ngadto sa CSWD ug usa ang pagpanghulga. (BANAT NEWS)